سیالکوٹ (مدثر چوہدری٫ بیوروچیف)فراز گراؤنڈ سانحہ میں متاثرہ خاندان کو صلح کے لیے دھمکیاں دینے کا مقدمہ درج، مرکزی ملزم مسٹر پتلو گرفتار۔ڈسکہ: فراز گراؤنڈ سانحہ میں جاں بحق ہونے والے نوجوان محمد ریحان کے اہل خانہ کو سابقہ مقدمے میں صلح کرنے اور ملزمان کے حق میں بیان دینے کے لیے مبینہ طور پر جان سے مارنے کی دھمکیاں دینے کے الزام میں پولیس نے مرکزی ملزم محمد انصر عرف مسٹر پتلو کو گرفتار کر لیا۔ تھانہ صدر ڈسکہ پولیس نے متاثرہ خاندان کی درخواست پر مقدمہ درج کرکے کارروائی شروع کر دی ہے۔تفصیلات کے مطابق فراز گراؤنڈ سانحہ میں جاں بحق ہونے والے محمد ریحان کے بہنوئی ابوبکر ولد سیف اللہ نے تھانہ صدر ڈسکہ میں تحریری درخواست جمع کروائی، جس میں مؤقف اختیار کیا گیا کہ مرکزی ملزم محمد انصر عرف مسٹر پتلو کے ایما پر بعض مسلح افراد کی جانب سے متاثرہ خاندان کو ہراساں کیا گیا اور سابقہ مقدمہ نمبر 1335/26 میں ملزمان کے ساتھ صلح کرنے اور ان کے حق میں بیان دینے کے لیے دباؤ ڈالتے ہوئے سنگین نتائج اور جان سے مارنے کی دھمکیاں دی گئیں۔درخواست گزار کے مطابق مبینہ دھمکیوں کا مقصد متاثرہ خاندان کو قانونی کارروائی سے دستبردار ہونے اور مقدمے میں ملزمان کے حق میں بیان دینے پر مجبور کرنا تھا۔ واقعے کی اطلاع ملنے پر تھانہ صدر ڈسکہ پولیس نے درخواست پر کارروائی کرتے ہوئے مقدمہ نمبر 1026/26 بجرم دفعات 506-B، 348، 109 اور 149 تعزیراتِ پاکستان درج کر لیا اور نامزد مرکزی ملزم محمد انصر عرف مسٹر پتلو کو گرفتار کر لیا۔پولیس ترجمان کے مطابق مقدمے کی مزید تفتیش میرٹ پر مکمل کرتے ہوئے تمام قانونی تقاضے پورے کیے جائیں گے اور واقعے میں ملوث دیگر کرداروں کے حوالے سے بھی قانون کے مطابق کارروائی عمل میں لائی جائے گی۔واضح رہے کہ فراز گراؤنڈ سانحے کے بعد متاثرہ خاندان کو مبینہ طور پر صلح اور بیان تبدیل کرنے کے لیے دھمکیاں دینے کا معاملہ سامنے آنے سے واقعے کی قانونی کارروائی اور متاثرہ خاندان کے تحفظ کا معاملہ بھی اہمیت اختیار کر گیا ہے۔ شہری حلقوں کی جانب سے مطالبہ کیا جا رہا ہے کہ متاثرہ خاندان کو مکمل تحفظ فراہم کیا جائے تاکہ وہ کسی دباؤ اور خوف کے بغیر قانونی عمل میں اپنا مؤقف پیش کر سکیں